Loy

قرآن او تخنیک

02.10.2012 05:25

قرآن او تخنیک

       قرآن او تخنيک د ګران رفیع الله ستانکزي یوه داسې ارزښتمنه ژباړه ده، چې د قرآني علومو د پوهاوي یوه مهمه او ضروري کړۍ بلل کیږي. د قرآن پېژندنې په برخه کې یوه مهمه موضوع د قرآني حقایقو اثباتول دي، د قرآني حقایقو د اثبات لپاره د هغو دلایلو او براهینو راوړل مهم او لازمې دي کوم چې بني بشر (که هغه مسلم وي یا غیر مسلم) پرې د عقل او بصیرت په سترګو قناعت وکولی شي. هغه څه چې بني بشر پرې قناعت کولی شي هغه په مشاهداتو او محسوساتو باندې د دلایلو بیانول دي (دلیل مشهود) او (دلیل محسوس) راوړل روایت ته قوت او منطق وربښي او ترینه انکار کول نا ممکنه کوي. کله چې دلیل او منطق په روایت کې موجود وي او بیا څوک ترینه انکار کوي، له عقل څخه منافي عمل بلل کیږي. هغه څوک چې د منطق، عقل او بصیرت خاوند وي هغه به کله هم له علمي او عیني حقایقو څخه منکر نشي.

د خدای (ج) پېغمبر (ص) د مکې کفارو ته د الله کلام او قرآني معجزات بیانول او رنګارنګ دلایل یې ورته د خدای (ج) د کلام او پېغامونو د حقانیت په اړه بیانول؛ نو هغوی له باطني اعتراف سره سره بیا هم ترینه انکار کاوه، نو همدا و، چې خدای (ج) ورته وویل، چې دوی د عقل، سترګو او غوږونو باوجود بیاهم ناپوه، ړانده او کاڼه دي.

 ((لهم قلوب لایفقهون بها و لهم آذان لا یسمعون بها و لهم اعین لایبصرون بها اولیک کالانعام بل هم اضل اولیک هم الغافلون)) ترجمه: دوی ماغزه او عقل لري، خو تعقل پرې نه شي کولی، دوی غوږونه لري، خو پرې اورېدلی نه شي، دوی سترګې لري، خو پرې لیدلی نه شي، دوی د څارویو په څېر دي، بلکې تر هغه هم بدتره دي، دوی غافلان دي.

د قرآن او تخنیک کتاب، د قرآني حقایقو د اثبات لپاره یوه ډېره مهمه او ګټوره هڅه ده، د حق او باطل په جنګ کې د اسلامي دعوتګرانو او دیني مبلغینو لپاره د دې کتاب لوستل او لرل ډېر ضروري بلکې حتمي ده.

ښاغلي ستانکزي په روانه او آسانه پښتو د قرآن او تخنیک کتاب وژباړه او د مقدس ذات د سپېڅلي کتاب د فهم د آسانه کولو یو مهم واجب یې ادا کړ.

زه باور لرم چې ژباړن به د دیني علومو د نورو کتابونو په ژباړې کې خپل زیات زیار او تلاش جاري وساتي او ډېر نور کتابونه به پښتو کړي.

پدې هم پوره باور لرم، چې یوه ورځ به داسې هم راځي، چې د حق د واقعي پلویانو له لورې به د خدای (ج) کلمه او د الله جل جلاله دین تر ټولو لوړ او عالي مقام ته رسیږي، ولو که تر ټولو وړه او مستضعفه ډله یې تر شا وي، ځکه چې دحق کلام همیشه لوړ او بلند دی ((وکلمة الله هی العلیا)).

پدې هم باور لرم، چې با‌‎طل د حق په وړاندې له پښو غورځیدونکی دی، ولو که د زمانې تر ټولو مستبد او ابلیسې استکباري لښکرې یې هم ترشا ولاړې وي، ځکه چې دا د الله (ج) وعده ده ((ان الباطل کان زهوقا)).

نو چې داسې ده بیا خو د حق په لار کې حکیمانه او مدبرانه جهاد په کار دی، داسې جهاد چې د اسلام سپېڅلی برم بیا راژوندی او د ټول انسانیت عروج پکې نغښتی وي، هغه عروج چې ټول انسانیت ته نیکمرغي، بریا، پرمختګ، سوکالي، مینه، وحدت، اطمینان او پاکي ور وبښي. د اسلام عزتمآب دین او الهي مقدس احکام یوازينۍ وسیله ده، چې دا هر څه راوړلی شي او بس.

هغه مهال، چې د خدای (ج) حبیب محمد صلی الله علیه وسلم له یوه غاره راووت او ټول بشریت ته یې د نجات، بریا، صمیمیت، مینې، اتحاد، زړه سوي او ترحم رڼا راوړه، نړۍ د جهالت له تېارو څخه نجات وموند، ځکه چې هغه مبارک حضرت، دین د حکمت، تدبیر او الهي نور په وسېلې ګمراه او سرګردانه بشریت ته ورساوه، نن هم بشریت د هوس او جهالت په ړندو تېارو کې لالهاند، ګمراه، سرګردان او ذلیل دی او نجات غواړي. بشریت ته نجات په وینو نه په ترحم باندې کېږي.

  نور به خبره پدې لنډه کړم، چې بس سلیم عقل پکار ده؛ تر څو مسلم امت د قرن له دې ((بلاګانو)) او آفتونو وژغوري، د بلاګانو سره جنګ د وینو ویالې او مسلسل هلاکتونه نشي ګټلی، بس عقل او تدبیر غواړي. له جلیل رب څخه اول ځان او بیا ټولو ته سلیم عقل او حکیم تدبیر غواړم. خدای دې زموږ زړونه په الهي نور روښانه کړي.

 د ښاغلي رفيع الله ستانکزي پر ژباړې قضاوت د ټولو لوستونکو حق بولم، بس داسې بوله چې ماته دا کتاب او ژباړه ډېره ښه ښکاري، حتماً یې ترپایه ولولئ.

 په درنښت

محمدآصف ننګ

پکتیکا، افغانستان

د مرغومې ۲۰مه، کال ۱۳۸۷

Rafiullah Stanikzai | Create Your Badge
د رفیع الله ستانکزي پاڼه - اړيکشمېره: 93700308908 + برېښليک: rafiullah.stanikzai@gmail.com